নিউজ ডেস্ক: শ্ৰীভূমি জিলাৰ পাথাৰকান্দিত ৰাজ্য চৰকাৰৰ সাংস্কৃতিক পৰিক্ৰমা বিভাগৰ উদ্যোগত ১৫ দিনীয়া গ্ৰীষ্মকালীন সাংস্কৃতিক কৰ্মশালাৰ শুভাৰম্ভ কৰা হৈছে। গ্ৰামাঞ্চলৰ শিশু-কিশোৰসকলৰ সুপ্ত প্ৰতিভাৰ বিকাশ, সৃজনশীল মনন গঢ়ি তোলা আৰু ৰাজ্যৰ সমৃদ্ধ সাংস্কৃতিক ঐতিহ্যৰ সৈতে নতুন প্ৰজন্মক পৰিচিত কৰাৰ উদ্দেশ্যে এই কৰ্মশালাৰ আয়োজন কৰা হৈছে। আজিৰে পৰা আৰম্ভ হোৱা এই কৰ্মশালা অহা ৩১ জুলাইলৈ চলিব।
শ্ৰীভূমি জিলা প্ৰশাসনৰ ব্যৱস্থাপনাত আৰু নিখিল বিষ্ণুপ্ৰিয়া মণিপুৰী সংস্কৃতি পৰিষদ, প্ৰতাপগড় আঞ্চলিক সমিতিৰ পৰিচালনাত পাথাৰকান্দি উন্নয়ন খণ্ডৰ অন্তৰ্গত মডেল এইচ.এছ. স্কুল চৌহদত কৰ্মশালাৰ শুভ উদ্বোধন কৰা হয়। অতিথিসকলে ঐতিহ্যগতভাৱে প্ৰদীপ প্ৰজ্বলন কৰি কৰ্মশালাৰ শুভাৰম্ভ কৰে।
উদ্বোধনী অনুষ্ঠানত অঞ্চলটোৰ বহু সংখ্যক অভিভাৱক, শিক্ষাৰ্থী, শিল্পী, শিক্ষক আৰু সংস্কৃতিপ্ৰেমী লোকৰ উপস্থিতিত এক উৎসৱমুখৰ পৰিবেশৰ সৃষ্টি হয়। বক্তাসকলে কয় যে, এনে কৰ্মশালাই নতুন প্ৰজন্মক সৃজনশীল কাৰ্যকলাপৰ প্ৰতি উৎসাহিত কৰাৰ লগতে স্থানীয় প্ৰতিভাৰ বিকাশতো গুৰুত্বপূৰ্ণ ভূমিকা পালন কৰিব।
সংস্কৃতি চৰ্চাৰ জৰিয়তে নতুন প্ৰজন্মক ঐতিহ্যৰ সৈতে সংযোগ কৰাৰ এই পদক্ষেপক লৈ পাথাৰকান্দি আৰু ইয়াৰ পাৰ্শ্বৱৰ্তী অঞ্চলসমূহত ব্যাপক উৎসাহ-উদ্দীপনাৰ সৃষ্টি হৈছে। স্থানীয় লোকসকলৰ আশা, ভৱিষ্যততো এনে কাৰ্যসূচী ধাৰাবাহিকভাৱে আয়োজন কৰা হ’লে অঞ্চলটোৰ বহু প্ৰতিভাৱান শিল্পীয়ে ৰাজ্যিক আৰু ৰাষ্ট্ৰীয় পৰ্যায়ত নিজৰ দক্ষতা প্ৰদৰ্শনৰ সুযোগ লাভ কৰিব।
