গুৱাহাটী, ২৬ জুলাই, ৰাষ্ট্ৰীয় স্বয়ংসেৱক সংঘ (আৰ.এছ.এছ.)-ৰ স্বয়ংসেৱক আৰু সেৱা ভাৰতীৰ কাৰ্যকৰ্তা সকলে উজনি অসমৰ ভয়াবহ বানপানীত ক্ষতিগ্ৰস্ত পৰিয়াল সমূহৰ বিভিন্ প্ৰকাৰে উদ্ধাৰ আৰু সাহাৰ্য কাৰ্যসূচী অব্যাহত ৰাখিছে। বানপানীত আক্ৰান্ত শিৱসাগৰ আৰু যোৰহাট জিলাৰ হাজাৰ হাজাৰ পৰিয়াল গৃহহীন হৈ পৰাৰ লগতে খাদ্য, বিশুদ্ধ খোৱাপানী, নিৰাপদ আশ্ৰয় আৰু জৰুৰী চিকিৎসা সেৱাৰ তীব্ৰ সংকটৰ সন্মুখীন হৈছে।
এনে এক দুৰ্যোগপূৰ্ণ মুহূৰ্তত স্বয়ংসেৱকসকলে নিৰৱচ্ছিন্নভাৱে আক্ৰান্ত অঞ্চলসমূহত সেৱা আগবঢ়াই আহিছে। শিৱসাগৰ জিলাৰ বেতবাৰী অঞ্চলৰ কাকতি গাঁও, ডি-গাঁও, ২ নং কোঁৱৰ গাঁও আৰু চেতিয়া কৈৱৰ্ত গাঁৱত স্বয়ংসেৱকসকলে এক ব্যাপক উদ্ধাৰ অভিযান চলাই ২০০ ৰো অধিক লোকক বানৰ কৱলৰ পৰা উদ্ধাৰ কৰি নিৰাপদ স্থান আৰু সাহায্য শিবিৰলৈ স্থানান্তৰিত কৰে। সুন্দৰ পুখুৰী, বামুণ পুখুৰী, গেলেকী আৰু ৰাজাবাৰী আদি জলমগ্ন অঞ্চলসমূহত সৰু নাৱৰ সহায়ত আৱদ্ধ পৰিয়ালসমূহৰ ওচৰ পাই ৰন্ধা খাদ্য, বিশুদ্ধ খোৱাপানী, জীৱনদায়িনী ঔষধ, বস্ত্ৰ আৰু অন্যান্য অত্যাৱশ্যকীয় সামগ্ৰী বিতৰণ কৰা হৈছে।
ৰাষ্ট্ৰীয় স্বয়ংসেৱক সংঘ আৰু সেৱা ভাৰতীৰ এই মানৱীয় সেৱা অভিযানে সংঘৰ সেই চিৰন্তন পৰম্পৰাকেই প্ৰতিফলিত কৰিছে, যাৰ বাবে আৰ.এছ.এছ.-ক “Ready for Selfless Service” (নিস্বাৰ্থ সেৱাৰ বাবে সদায় সাজু) বুলি অভিহিত কৰা হয়। “নৰ সেৱাই নাৰায়ণ সেৱা”—এই মহান আদৰ্শৰে অনুপ্ৰাণিত হৈ স্বয়ংসেৱক আৰু সেৱা ভাৰতীৰ কাৰ্যকৰ্তাসকলে এই ভয়াৱহ প্ৰাকৃতিক দুৰ্যোগৰ সময়ত আক্ৰান্ত লোকসকলৰ কাষত দৃঢ়ভাৱে থিয় দি আশা, সাহস আৰু সম্বল আগবঢ়াই আহিছে।
