নলবাৰীৰ কাজিপাৰাত বৃহস্পতিবাৰে অনুষ্ঠিত হয় এক বিশেষ শ্ৰদ্ধাঞ্জলি অনুষ্ঠান । বাসনা সাহিত্য গোষ্ঠীৰ উদ্যোগত সদৌ অসম সাংবাদিক সন্থাৰ প্ৰাক্তন সভাপতি তথা বিশিষ্ট সাংবাদিক-সাহিত্যিক ৰোহিনী মেধিৰ নৱম মৃত্যু বাৰ্ষিকী উপলক্ষে অনুষ্ঠিত হয় এই শ্ৰদ্ধাঞ্জলি অনুষ্ঠান। প্ৰয়াত ৰোহিনী মেধিৰ সহধৰ্মিনী গিৰিজা মেধিয়ে প্ৰতিচ্ছবিত বন্তি প্ৰজ্বলন কৰে । প্ৰতিচ্ছবিত মাল্যাৰ্পণ কৰে ৰমাকান্ত মেধিয়ে। সভাৰ আৰম্ভণিতে সাংবাদিক নিপজ্যোতি মেধিৰ সম্পাদিত ‘পষেকীয়া আমাৰ বাতৰি’ কাকতখন উন্মোচন কৰে ‘দৈনিক জনমভূমি’ কাকতৰ কাৰ্যবাহী সম্পাদক সঞ্জীৱ কুমাৰ ফুকনে ৷ কাৰ্যবাহী সম্পাদক ফুকনে মফচলীয় সাংবাদিকসকলৰ ন্যায্যপ্ৰাপ্তিৰ কাৰণে ৰোহিনী মেধিয়ে সদায় মাত মাতিছিল বুলি উল্লেখ কৰে ।
ইফালে বিশিষ্ট শিক্ষাবিদ ড° ফণীধৰ তালুকদাৰে প্ৰয়াত ৰোহিনী মেধিৰ সৈতে থকা বন্ধুত্বৰ কথা সোঁৱৰণ কৰে। ‘অসমীয়া প্ৰতিদিন’ কাকতৰ উপ-সম্পাদক অঞ্জন কুমাৰ শৰ্মা স্মৃতিচাৰণ সভাখনত উপস্থিত থাকে ।
উক্ত অনুষ্ঠানতে বিশিষ্ট লেখিকা দিপীকা ফুকনৰ ‘মনৰ খৰিকাজাঁই’ নামৰ কাব্যসংকলনখনৰ বাবে ৰোহিনী মেধি সোঁৱৰণী বঁটা-২০২৪ প্ৰদান কৰা হয় । ‘নিয়মীয়া বাৰ্তা’ কাকতৰ উপ-সম্পাদক প্ৰদীপ কুমাৰ গগৈক ৰোহিনী মেধি সোঁৱৰণী প্ৰেৰণা বঁটা – ২০২৪ প্ৰদান কৰা হয়।
অনুষ্ঠানটোত বিশিষ্ট শিক্ষাবিদ ডঃ শৈলেন্দ্ৰ প্ৰসাদ শৰ্মা , অসম হাইস্কুল শিক্ষক সংস্থাৰ সভাপতি সুনন্দ কলিতা, ‘NE Bharat 24’ৰ আউটপুৰ এডিটৰ দিগন্ত কুমাৰ নাথ, ‘অসম নিউজ’ৰ পৰিচালন সঞ্চালক দেবী প্ৰসাদ অধিকাৰীকে ধৰি কেবাগৰাকীও বিশিষ্ট ব্যক্তি উপস্থিত থাকে।
