নিউজ ডেস্ক:
পেলেষ্টাইনলৈ ভাৰতৰ মানৱীয় সাহায্য। গাজাৰ অল-আহলি চিকিৎসালয় আক্ৰমণত ৫০০ৰো অধিক লোকৰ মৃত্যু হোৱাৰ পিছতে পেলেষ্টাইনৰ জনসাধাৰণৰলৈ ভাৰতৰ এই মানৱীয় সাহায্য। দেওবাৰে প্ৰায় ৬.৫ টন চিকিৎসা সাহায্য আৰু ৩২ টন দুৰ্যোগ সাহায্য সামগ্ৰী কঢ়িয়াই ইজিপ্তৰ এল-আৰিছ বিমানবন্দৰলৈ ৰাওনা হয় IAFC-17 বিমান খন। সামগ্ৰীসমূহৰ ভিতৰত আছে অত্যাৱশ্যকীয় জীৱন ৰক্ষাকাৰী ঔষধ, অস্ত্ৰোপচাৰৰ সামগ্ৰী, তম্বু, শোৱা বেগ, টাৰ্পলিন, চেনিটেৰী ইউটিলিটি, পানী বিশুদ্ধকৰণ টেবলেট আদি প্ৰয়োজনীয় সামগ্ৰী।
ইয়াৰ পূৰ্বে বৃহস্পতিবাৰে প্ৰধানমন্ত্ৰী নৰেন্দ্ৰ মোদীয়ে পেলেষ্টাইনৰ ৰাষ্ট্ৰপতি মাহমুদ আব্বাছৰ সৈতে কথা পাতি এই নৃশংস ঘটনাক তীব্ৰ নিন্দাৰ লগতে গভীৰ শোক প্ৰকাশ কৰে। প্ৰধানমন্ত্ৰী মোদীয়ে ইজৰাইল-পেলেষ্টাইন বিষয়ত ভাৰতৰ দীৰ্ঘদিনীয়া নীতিগত স্থিতিক সমৰ্থন কৰাৰ লগতে অঞ্চলটোৰ সন্ত্ৰাসবাদ, হিংসা আৰু নিৰাপত্তা পৰিস্থিতিক লৈ গভীৰ উদ্বেগ প্ৰকাশ কৰে।।