NEET UG ২০২৬ৰ ফলাফল ঘোষণা: উত্তীৰ্ণ ১১.২১ লাখ, শীৰ্ষত পঞ্জাব আৰু হাৰিয়ানাৰ দুজন পৰীক্ষাৰ্থী
নিউজ ডেস্ক: ৰাষ্ট্ৰীয় পৰীক্ষা সংস্থা (NTA)-এ বৃহস্পতিবাৰে NEET UG ২০২৬ৰ ফলাফল ঘোষণা কৰিছে। এইবাৰ মুঠ ১১.২১ লাখ পৰীক্ষাৰ্থীয়ে উত্তীৰ্ণ হৈ MBBS, BDS, AYUSH আৰু অন্যান্য স্নাতক চিকিৎসা পাঠ্যক্ৰমত নামভৰ্তিৰ বাবে যোগ্যতা লাভ কৰিছে। ফলাফল সময়মতে ঘোষণা হোৱাত চিকিৎসা শিক্ষাৰ নামভৰ্তি আৰু কাউন্সেলিং সূচী নিৰ্ধাৰিত সময়সূচী অনুসৰিয়েই সম্পন্ন হোৱাৰ পথ মুকলি হৈছে।
পৰীক্ষাৰ্থীসকলে neet.nta.nic.in-ত গৈ নিজৰ স্ক’ৰকাৰ্ড ডাউনলোড কৰিব পাৰিব।
ফলাফল অনুসৰি, ৭২০ নম্বৰৰ ভিতৰত ৭১৫ নম্বৰ লাভ কৰি পঞ্জাবৰ আয়ান গুপ্তা আৰু হাৰিয়ানাৰ পানশুল বানচাল যুটীয়াভাৱে সৰ্বভাৰতীয় শীৰ্ষ স্থান দখল কৰিছে।
NTAৰ তথ্য অনুসৰি—
১৯ জন পৰীক্ষাৰ্থীয়ে ৭০০ৰ অধিক নম্বৰ লাভ কৰিছে।
১৩৮ জনে ৬৯০ৰ অধিক নম্বৰ লাভ কৰিছে।
১,৪৯২ জনে ৬৫০ বা তাতকৈ অধিক নম্বৰ লাভ কৰিছে।
১০,১৬০ জনে ৬০০ বা তাতকৈ অধিক নম্বৰ লাভ কৰিছে।
৯০,৭৮০ জনে ৫০০ বা তাতকৈ অধিক নম্বৰ লাভ কৰিছে।
NTA-এ জনোৱা মতে, শীৰ্ষ ১৩৮ জন পৰীক্ষাৰ্থীৰ ৯৩ শতাংশতকৈ অধিক প্ৰথমবাৰৰ বাবে NEET পৰীক্ষাত অৱতীৰ্ণ হৈছিল। তেওঁলোকৰ প্ৰায় সকলোৰে বয়স ১৭ৰ পৰা ১৯ বছৰৰ ভিতৰত।
দেশৰ ৩৬খন ৰাজ্য আৰু কেন্দ্ৰীয় শাসিত অঞ্চলৰ পৰা পৰীক্ষাৰ্থীসকলে উত্তীৰ্ণ হৈছে। ৰাজ্য ভিত্তিক উত্তীৰ্ণৰ সংখ্যাত উত্তৰ প্ৰদেশ শীৰ্ষত আছে, য’ত ১.৭ লাখতকৈ অধিক পৰীক্ষাৰ্থী উত্তীৰ্ণ হৈছে। আনহাতে, লক্ষদ্বীপত ৪৩ জন পৰীক্ষাৰ্থী উত্তীৰ্ণ হৈছে।
NTAৰ তথ্য অনুসৰি, ১৭খন ৰাজ্যৰ শীৰ্ষ পৰীক্ষাৰ্থীয়ে ৭০০ বা তাতকৈ অধিক নম্বৰ লাভ কৰিছে। আনহাতে, ২৬খন ৰাজ্যৰ শীৰ্ষ পৰীক্ষাৰ্থীয়ে ৬৯০তকৈ অধিক নম্বৰ লাভ কৰিছে।
শ্ৰেণীভিত্তিক উত্তীৰ্ণৰ সংখ্যা—
Gen-EWS: ৯৫,০২৬
PwBD: ৩,৬৬৬
PwD: ৩০৩
ইয়াৰ লগতে শ্ৰেণীভিত্তিক কাট-অফ নম্বৰ আৰু যোগ্যতাৰ পাৰ্চেণ্টাইল-ও প্ৰকাশ কৰা হৈছে।
ফলাফল ঘোষণা হোৱাৰ এদিন পূৰ্বে NTA-এ চূড়ান্ত Final Answer Key প্ৰকাশ কৰিছিল। ইয়াৰ পূৰ্বে পদাৰ্থ বিজ্ঞানৰ দুটা প্ৰশ্ন সংশোধন কৰা হয়। এটা প্ৰশ্ন বাদ দিয়া হয় আৰু আন এটা প্ৰশ্নৰ ক্ষেত্ৰত দুটা উত্তৰ সঠিক বুলি গ্ৰহণ কৰা হয়। ফলস্বৰূপে মূল্যায়ন নীতি অনুসৰি সকলো পৰীক্ষাৰ্থীক ৮টা বোনাছ নম্বৰ প্ৰদান কৰা হৈছে।
পৰীক্ষা প্ৰক্ৰিয়াৰ অংশ হিচাপে ২৫ জুনত অস্থায়ী Answer Key, ১৩ জুলাইৰ পৰা ১৫ জুলাইলৈ OMR ৰেচপন্স শ্বীট, ১৬ জুলাইত Final Answer Key আৰু সেইদিনাই ফলাফল ঘোষণা কৰা হয়।
ফলাফল ঘোষণাৰ পিছত যোগ্য পৰীক্ষাৰ্থীসকলে MBBS, BDS, AYUSH আৰু অন্যান্য স্নাতক চিকিৎসা পাঠ্যক্ৰমৰ নামভৰ্তি কাউন্সেলিঙত অংশগ্ৰহণ কৰিব। ১৫ শতাংশ অল ইণ্ডিয়া কোটাৰ কাউন্সেলিং মেডিকেল কাউন্সেলিং কমিটি (MCC)-এ পৰিচালনা কৰিব। আনহাতে, বাকী ৮৫ শতাংশ ৰাজ্যিক কোটাৰ আসনত সংশ্লিষ্ট ৰাজ্যসমূহৰ কাউন্সেলিং কৰ্তৃপক্ষই নামভৰ্তি সম্পন্ন কৰিব।
NTA-এ পৰীক্ষাৰ্থীসকলক কাউন্সেলিং-সংক্ৰান্তীয় সকলো তথ্য কেৱল চৰকাৰী ৱেবছাইটৰ জৰিয়তে অনুসৰণ কৰিবলৈ আৰু ভুৱা নামভৰ্তিৰ প্ৰস্তাৱ, ধন দাবী বা ব্যক্তিগত তথ্য বিচৰা প্ৰতাৰণামূলক যোগাযোগৰ পৰা সাৱধান থাকিবলৈ আহ্বান জনাইছে।
