গুৱাহাটী: ডিব্ৰুগড়ত আৰক্ষীয়ে গ্ৰেপ্তাৰ কৰিছে ইমতিয়াজ আলি নামৰ এজন ব্যক্তিক। চাকৰি দিয়াৰ লগতে বিভিন্নজনক দোকান দিয়াৰ প্ৰলোভন দেখুৱাই কোটি কোটি টকা আত্মসাৎ কৰাৰ অভিযোগত আৰক্ষীয়ে ইমতিয়াজক গ্ৰেপ্তাৰ কৰে।
জানিব পৰা মতে, মহানগৰৰ চিৰিং চাপৰি আৰু আমোলাপট্টি সংযোগী পথৰ কাষত থকা নিজা গৃহতে দোৱাৰ বন্ধ কৰি আত্মগোপন কৰি আছিল ইমতিয়াজ। পিছত দণ্ডাধীশৰ উপস্থিতিত বৃহৎ আৰক্ষীৰ দলে গৃহটোৰ দোৱাৰ ভাঙি ভিতৰত প্ৰৱেশ কৰি ইমতিয়াজক গ্ৰেপ্তাৰ কৰে।
আৰক্ষীয়ে ইমতিয়াজৰ গেৰেজৰ পৰা এখন মাৰ্চিডিজ বেঞ্জ (AS 01 TC 2792), ইনভা ক্ৰিষ্টা (AS 01 EL 1183) আৰু আই-টেন (AS 06 T 7286) বাহন উদ্ধাৰ কৰে। ইয়াৰে ইন’ভা ক্ৰিষ্টা বাহনখন আৰক্ষীয়ে জব্দ কৰিছে যদিও বাকী দুখন বাহন জব্দ কৰা হোৱা নাই। ইফালে, ইমতিয়াজৰ পত্নী মনিশা বেগম ওৰফে পিংকিকো আৰক্ষীয়ে আটক কৰিছে। সমগ্ৰ ঘটনাক লৈ আৰক্ষীৰ তদন্ত অব্যাহত আছে।
