গুৱাহাটী: শ্বিলঙত ১৯ আগষ্টত সংঘটিত হিংসাত্মক ঘটনাক লৈ কঠোৰ স্থিতি গ্ৰহণ কৰিছে মেঘালয় উচ্চ ন্যায়ালয়ে। খাচী ছাত্ৰ সন্থাৰ প্ৰতিবাদৰ সময়ত সংঘটিত উদ্ভণ্ডালি, ৰাজহুৱা সম্পত্তি আৰু বাহন ধ্বংস, শিক্ষাৰ্থী তথা সাধাৰণ নাগৰিকক আক্ৰমণৰ অভিযোগৰ প্ৰতি লক্ষ্য ৰাখি উচ্চ ন্যায়ালয়ে নিজাববীয়াকৈ এটা ৰাজহুৱা স্বাৰ্থজড়িত গোচৰ গ্ৰহণ কৰিছে।
মুখ্য ন্যায়াধীশৰ আদালতে এই ঘটনাক গুৰুত্বসহকাৰে লৈ নিজাববীয়াকৈ গোচৰটো গ্ৰহণ কৰে। ১৯ আগষ্টৰ প্ৰতিবাদৰ সময়ত ৰাজহুৱা সম্পত্তি ধ্বংস কৰাৰ লগতে বাহন ভাঙি লণ্ডভণ্ড কৰাৰ অভিযোগ উত্থাপিত হৈছিল। ইয়াৰ উপৰি বিদ্যালয়লৈ যোৱা শিক্ষাৰ্থী আৰু সাধাৰণ নাগৰিকক বৰ্বৰভাৱে আক্ৰমণ কৰাৰো অভিযোগ উত্থাপন হৈছে।
ঘটনাৰ সময়ত স্বামী বিবেকানন্দ আৰু নেতাজী সুভাষ চন্দ্ৰ বসুৰ মূৰ্তি ধ্বংস কৰাৰ অভিযোগক লৈও উচ্চ ন্যায়ালয়ে কঠোৰ মনোভাব প্ৰকাশ কৰে। জাতীয় ব্যক্তিত্বৰ মূৰ্তি ধ্বংসৰ দৰে ঘটনাক আদালতে গুৰুত্বসহকাৰে গ্ৰহণ কৰিছে।
উল্লেখ্য যে ১৯ আগষ্টত খাচী ছাত্ৰ সন্থাৰ প্ৰতিবাদী কাৰ্যসূচীক কেন্দ্ৰ কৰি শ্বিলঙত পৰিস্থিতি উত্তপ্ত হৈ পৰিছিল। ঘটনাক কেন্দ্ৰ কৰি অসমৰ বাহন আৰু চালক-যাত্ৰীক আক্ৰমণ কৰাৰ অভিযোগো উত্থাপিত হৈছে। এই ঘটনাৰ পাছতে অসমতো ব্যাপক প্ৰতিক্ৰিয়াৰ সৃষ্টি হৈছে।
এতিয়া মেঘালয় উচ্চ ন্যায়ালয়ৰ নিজাববীয়া হস্তক্ষেপৰ ফলত ঘটনাটোৱে নতুন মাত্ৰা লাভ কৰিছে। ৰাজহুৱা সম্পত্তি সুৰক্ষা, সাধাৰণ নাগৰিকৰ নিৰাপত্তা আৰু হিংসাত্মক কাৰ্যকলাপ নিয়ন্ত্ৰণৰ ক্ষেত্ৰত প্ৰশাসনৰ ভূমিকা এই গোচৰৰ জৰিয়তে আদালতৰ নিৰীক্ষণলৈ আহিছে।
গোচৰটোৰ পৰৱৰ্তী শুনানি ২৪ আগষ্টত অনুষ্ঠিত হ’ব। সেইদিনা মেঘালয় চৰকাৰে আদালতৰ নিৰ্দেশ অনুসৰি বিস্তৃত প্ৰতিবেদন দাখিল কৰিব। পৰৱৰ্তী শুনানিত উচ্চ ন্যায়ালয়ে কি নিৰ্দেশ দিয়ে, সেয়া এতিয়া বিশেষ গুৰুত্বপূৰ্ণ হৈ পৰিছে।
