নগাঁও, ২৭ জুলাইঃ মৰণোত্তৰ পৰীক্ষাৰ বাবে উৎকোচ লোৱাৰ অভিযোগত গ্ৰেপ্তাৰ হোৱা নগাঁও চিকিৎসা মহাবিদ্যালয়ৰ ফৰেনচিক মেডিচিন আৰু টক্সিক’ল’জি বিভাগৰ অধ্যাপক ডাঃ মনোজ কুমাৰ সিনহাক চাকৰিৰ পৰা নিলম্বন কৰা হৈছে। ২০ জুনৰ পৰা কাৰ্যকৰী হোৱাকৈ এই নিলম্বনৰ নিৰ্দেশ জাৰি কৰা হৈছে।
নিলম্বনকালীন সময়ত ডাঃ সিনহাই নগাঁও ত্যাগ কৰিব নোৱাৰিব। কোনো বিশেষ প্ৰয়োজনত জিলাৰ বাহিৰলৈ যাবলগীয়া হ’লে নগাঁও চিকিৎসা মহাবিদ্যালয়ৰ অধ্যক্ষৰ পূৰ্বানুমতি ল’ব লাগিব বুলি নিৰ্দেশত উল্লেখ কৰা হৈছে।
ঘটনাটো পোহৰলৈ অহাৰ পিছতে নগাঁওৰ জিলা আয়ুক্ত দেৱাশিষ শৰ্মাৰ তৎপৰতাত আৰক্ষীয়ে চিকিৎসকগৰাকীক গ্ৰেপ্তাৰ কৰিছিল। অৱশ্যে গ্ৰেপ্তাৰৰ প্ৰায় এসপ্তাহ পিছতে তেওঁ আদালতৰ পৰা জামিন লাভ কৰে আৰু পুনৰ চাকৰিত যোগদানৰ বাবে তৎপৰতা চলাই আছিল।
ইয়াৰ মাজতে ২৭ জুলাইত জাৰি হোৱা নিলম্বনৰ নিৰ্দেশে ঘটনাটোক নতুন মোৰ দিয়ে। এতিয়ালৈকে চলি থকা তদন্ত সম্পূৰ্ণ নোহোৱালৈকে ডাঃ মনোজ কুমাৰ সিনহা নিলম্বিত অৱস্থাতেই থাকিব।
