নিউজ ডেস্ক:
আজি বিশ্ব সংগীত দিৱস। প্ৰতি বছৰে ২১ জুনত বিশ্ববাসীয়ে উদযাপন কৰি আহিছে সংগীত দিৱস। ১৯৮২ চনৰ ২১ জুনত পেৰিছত প্ৰথমবাৰৰ বাবে অনুষ্ঠিত হৈছিল বিশ্ব সংগীত দিৱস। সংগীতৰ সাৰ্বজনীন ভাষা আৰু ইয়াৰ সাংস্কৃতিক, জাতিগত, সামাজিক পটভূমি নিৰ্বিশেষে মানুহক একত্ৰিত কৰাৰ বাবে উৎসৰ্গিত এই দিনটো। এই দিৱসৰ লক্ষ্য হৈছে অপেশাদাৰী আৰু পেশাদাৰী সংগীতজ্ঞসকলক পথ, উদ্যান আৰু কনচাৰ্ট হল আদি ৰাজহুৱা স্থানত বিনামূলীয়াকৈ অনুষ্ঠান পৰিৱেশন কৰিবলৈ উৎসাহিত কৰা।
বিশ্ব সংগীত দিৱস সন্দৰ্ভত প্ৰথমে ১৯৮২ চনত সুৰকাৰ মৰিছ ফ্লেউৰেট আৰু সাংস্কৃতিক সাংবাদিক হিচাপেও পৰিচিত এজন ৰেডিঅ’ প্ৰযোজকৰ সৈতে ফ্ৰান্সৰ তদানীন্তন সাংস্কৃতিক মন্ত্ৰী জেক লেঙে প্ৰস্তাৱ কৰিছিল।তেওঁলোকৰ উদ্দেশ্য আছিল এনে এটা অনুষ্ঠান সৃষ্টি কৰা, য’ত পেশাদাৰী আৰু অপেশাদাৰী সংগীতজ্ঞ উভয়েই নিজৰ প্ৰতিভাক বৃহৎ সংখ্যক দৰ্শকৰ মাজলৈ লৈ যাব পাৰিব। এই উদযাপন কালক্ৰমত বিয়পি পৰিল বিশ্বৰ ১২০খনতকৈও অধিক দেশলৈ ।।