গুৱাহাটী: মণিপুৰৰ সেনাপতি আৰু কাষৰীয়া কাংপকপি জিলাত সোমবাৰে পুৱাৰে পৰা পুনৰ উত্তেজনাময় পৰিস্থিতিৰ সৃষ্টি হয়। অঞ্চলটোত হোৱা গুলীচালনাত ৫৪ বছৰীয়া এজন CRPF কনিষ্টবল গুলীৰ আঘাতত আহত হয়। আহত জোৱানজনক সেনাপতি জিলা চিকিৎসালয়ত ভৰ্তি কৰোৱা হৈছে।
প্ৰাপ্ত তথ্য অনুসৰি, পুৱা প্ৰায় ২.৪০ বজাত টাফৌ কুকি অঞ্চলত প্ৰথমে অগ্নিকাণ্ডৰ ঘটনা সংঘটিত হয়। ইয়াৰ পিছত 9MR আৰু মাৰেইমেই অঞ্চলতো কেইবাটাও ঘৰ জ্বলাই দিয়া বা ভাঙি পেলোৱাৰ অভিযোগ উত্থাপিত হয়। স্থানীয় সূত্ৰ অনুসৰি, নগা সম্প্ৰদায়ৰ লোকৰ কেইবাটাও ঘৰ এই ঘটনাত ক্ষতিগ্ৰস্ত হৈছে।
পুৱা প্ৰায় ৯.২০ বজাত সাংবাদিকসকলে ঘটনাস্থলীত উপস্থিত হৈ জ্বলি যোৱা আৰু ক্ষতিগ্ৰস্ত ঘৰসমূহৰ দৃশ্য সংগ্ৰহ কৰি থকাৰ সময়তে পুনৰ গুলীচালনা হয়। আহত CRPF জোৱানজনে গুলী কোন দিশৰ পৰা আহিছিল সেয়া নিশ্চিত কৰিব নোৱাৰা বুলি জানিবলৈ দিয়ে।
ইফালে, ঘটনাৰ প্ৰতিবাদত নগা স্বেচ্ছাসেৱকসকলে ২ নং ৰাষ্ট্ৰীয় ঘাইপথৰ ইম্ফল-ডিমাপুৰ পথ অৱৰোধ কৰে। ফলত মণিপুৰ আৰু নাগালেণ্ডৰ মাজৰ গুৰুত্বপূৰ্ণ এই পথত যান-বাহন চলাচল ব্যাহত হয়।
টাফৌ কুকি গাঁও কমিটিয়ে গাঁওখনত এজন বাসিন্দাৰ ঘৰ জ্বলাই দিয়াৰ ঘটনাক তীব্ৰ গৰিহণা দি ২৪ ঘণ্টাৰ ভিতৰত জড়িত লোকসকলক দায়িত্ব স্বীকাৰ কৰি বিষয়টো কুকিৰ নিজা নিয়ম অনুসৰি সমাধান কৰিবলৈ আহ্বান জনাইছে।
পৰিস্থিতি নিয়ন্ত্ৰণৰ বাবে সেনাপতি আৰু কাংপকপিৰ কাষৰীয়া অঞ্চলত নিৰাপত্তা বাহিনী মোতায়েন কৰা হৈছে। ঘটনাৰ সৈতে জড়িত পৰিস্থিতি, ক্ষয়-ক্ষতি আৰু আন কোনো লোক হতাহত হৈছে নে নাই, সেই বিষয়ে কৰ্তৃপক্ষই তথ্য সংগ্ৰহ কৰি আছে।
