নতুন দিল্লী, ১৩ ছেপ্টেম্বৰ: বিশ্বজুৰি বৃদ্ধি পোৱা অস্থিৰতাই সাধাৰণ জনতাৰ জীৱনত নেতিবাচক প্ৰভাৱ পেলোৱাৰ সময়তে ব্ৰিকছক সহযোগিতা, সমন্বিত বিকাশ আৰু মানৱকল্যাণৰ বাবে অধিক শক্তিশালী ভূমিকা গ্ৰহণ কৰিবলৈ আহ্বান জনাইছে প্ৰধানমন্ত্ৰী নৰেন্দ্ৰ মোদীয়ে।
ভাৰত মণ্ডপমত আয়োজিত দুদিনীয়া ব্ৰিকছ সন্মিলনৰ সামৰণি অধিৱেশনত ভাষণ দি মোদীয়ে কয় যে বৰ্তমানৰ বৈশ্বিক প্ৰত্যাহ্বানসমূহ মোকাবিলা কৰিবলৈ ব্ৰিকছে একেলগে আগবাঢ়িব লাগিব। মোদীয়ে বিশেষকৈ প্ৰযুক্তি আৰু জটিল খনিজ পদাৰ্থক প্ৰধান অস্ত্ৰৰূপে ব্য়ৱহাৰ কৰাক লৈ গভীৰ উদ্বেগ প্ৰকাশ কৰি কয় যে এনে প্ৰৱণতাই বিশ্বৰ অংশীদাৰী প্ৰগতি আৰু সমৃদ্ধিৰ পথত বাধা সৃষ্টি কৰিব পাৰে।
ইফালে, চীনৰ ৰাষ্ট্ৰপতি জি জিনপিঙে ‘বৃহত্তৰ ব্ৰিকছ’ৰ জৰিয়তে উদীয়মান অৰ্থনীতিসমূহৰ মাজত সহযোগিতা অধিক গভীৰ কৰাৰ বাবে কেইবাটাও পদক্ষেপৰ কথা উল্লেখ কৰে। বেইজিঙে ব্ৰিকছক গ্ল’বেল ছাউথৰ উন্নয়নৰ বাবে এক ব্যৱহাৰিক সহযোগিতামূলক মঞ্চ হিচাপে গঢ়ি তুলিবলৈ গুৰুত্ব আৰোপ কৰিছে।
ৰাছিয়াৰ ৰাষ্ট্ৰপতি ভ্লাদিমিৰ পুটিন, চীনৰ ৰাষ্ট্ৰপতি জি জিনপিং, ইৰাণৰ ৰাষ্ট্ৰপতি মাছুদ পেজেছকিয়ান আৰু আবুধাবিৰ ক্ৰাউন প্ৰিন্স মহম্মদ বিন জায়েদ আল নাহিয়ানকে ধৰি কেইবাগৰাকীও বিশ্বনেতাই সন্মিলনত অংশগ্ৰহণ কৰে।
ৰাছিয়া-ইউক্ৰেইন যুদ্ধ, পশ্চিম এছিয়াৰ অস্থিৰতা আৰু নতুন আমেৰিকান শুল্ক নীতিৰ ফলত বিশ্ব অৰ্থনীতি আৰু ভূ-ৰাজনীতিত অনিশ্চয়তা বৃদ্ধি পোৱাৰ সময়ত এইবাৰৰ ব্ৰিকছ সন্মিলনে বিশেষ তাৎপৰ্য লাভ কৰিছে।
