আন্তঃৰাষ্ট্ৰীয় ফুটবলত নুমলীগড় উচ্চতৰ মাধ্যমিক বিদ্যালয়ৰ দল । অসম ক্ৰীড়া বোৰ্ডৰ উপাধ্যক্ষ আকাশ ফুকনৰ দলটোলৈ খেলৰ সামগ্ৰী প্ৰদান । অহা ৩১ আগষ্টৰ পৰা ১১ ছেপ্টম্বৰলৈ নতুন দিল্লীত হ’ব লগা আন্তঃৰাষ্ট্ৰীয় ১৭ বছৰ অনুৰ্ধৰ সুব্ৰত কাপ ফুটবল খেলৰ বাবে অসম দলক প্ৰতিনিধিত্ব কৰিব নুমলীগড় উচ্চতৰ মাধ্যমিক বিদ্যালয়ৰ ফুটবল দলটোৱে । নতুন দিল্লীলৈ বুলি নুমলীগড়ৰ পৰা দলটো ২৮ আগষ্টত সন্ধিয়া ৰাওনা হব । দলটোৰ পূৰ্ণ গতিত প্ৰশিক্ষণ নুমলীগড় উচ্চতৰ মাধ্যমিক বিদ্যালয়ৰ খেল পথাৰত চলি আছে । ইতিমধ্যে ১৬ জন খেলুৱৈ নাম-তালিকা প্ৰস্তুত কৰি পঞ্জিয়নৰ লগতে প্ৰাথমিক কাম-কাজ সম্পূৰ্ণ কৰি তুলিছে । দলটোক বিভিন্ন দল- সংগঠনৰ তৰফৰ পৰা অভিনন্দন জনাইছে বুলি বিদ্যালয়ৰ সূত্ৰত প্ৰকাশ । দলটোৰ প্ৰশিক্ষক আদিত্য শৰ্মা আৰু মেনেজাৰ ৰবিন দত্ত ।
