নিউজ ডেস্ক:
ৰাজ্যৰ চাৰিখন জিলাৰ একত্ৰীকৰণৰ সন্দৰ্ভত গুৱাহাটী উচ্চ ন্যায়ালয়ে সোমবাৰে অসম চৰকাৰক জাৰি কৰে কাৰণ দৰ্শোৱাৰ জাননী । যোৱা বছৰ ৩১ ডিচেম্বৰত কেবিনেটৰ সিদ্ধান্তৰ পিছত জাৰি কৰে এই জাননি । কেবিনেটৰ সিদ্ধান্ত অনুসৰি অসমৰ চাৰিখন জিলাৰ মূল অবিভক্ত জিলাৰ সৈতে একত্ৰিত হোৱাৰ বিষয়ে অৱগত কৰিছিল। বিষয়টো সন্দৰ্ভত দাখিল কৰা এখন পি আই এলৰ শুনানি গ্ৰহণ কৰি গুৱাহাটী উচ্চ ন্যায়ালয়ে আজি অসম চৰকাৰক চাৰিখন জিলাৰ একত্ৰীকৰণৰ বিষয়ে তথ্য প্ৰদান কৰিবলৈ নিৰ্দেশ দিয়ে। আদালতে চৰকাৰক কাৰণ দৰ্শোৱাৰ জাননী জাৰি কৰাৰ লগতে এমাহৰ ভিতৰত বিৱৰণ প্ৰদান কৰিবলৈ নিৰ্দেশ দিছে ।
ড০ সঞ্জু বৰুৱা নামৰ এজন কংগ্ৰেছ নেতাই প্ৰথমতে একত্ৰীকৰণৰ বিৰুদ্ধে দাখিল কৰিছিল এখন পি আই এল । বিশ্বনাথ জিলাৰ একত্ৰীকৰণৰ বিৰুদ্ধেও দাখিল কৰা হৈছিল পিআইএল । তদুপৰি, হোজাই জিলাৰ একত্ৰীকৰণৰ বিৰুদ্ধে এখন পিআইএল দাখিল কৰা হৈছিল বুলি জানিব পৰা গৈছে।
উল্লেখ্য যে, ৩১ ডিচেম্বৰত অসম চৰকাৰে ৰাজ্যখনৰ চাৰিখন জিলাক মূল অবিভক্ত জিলাৰ সৈতে একত্ৰিত কৰাৰ সিদ্ধান্তৰ বিষয়ে অৱগত কৰিছিল। দিল্লীত ৰাজ্যিক কেবিনেটৰ বৈঠকত লোৱা হৈছিল এই সিদ্ধান্ত । আৰপি আইন, ১৯৫০ৰ ধাৰা ৮এ অনুসৰি অসমত বিধানসভা আৰু সংসদীয় সমষ্টিৰ সীমানিৰ্ধাৰণ আৰম্ভ কৰাৰ নিৰ্বাচন আয়োগৰ (ইচি) সিদ্ধান্তৰ পিছত আৰম্ভ কৰা সীমানিৰ্ধাৰণ প্ৰক্ৰিয়াৰ সৈতে সংগতি ৰাখি এই সিদ্ধান্ত গ্ৰহণ কৰিছিল। চৰকাৰে লোৱা সিদ্ধান্ত অনুসৰি, বজালী জিলাক বৰপেটা জিলাৰ সৈতে একত্ৰিত কৰা হৈছিল, বিশ্বনাথ জিলাক শোনিতপুৰ জিলাৰ সৈতে একত্ৰিত কৰা হৈছিল, হোজাই জিলাক নগাঁও জিলাৰ সৈতে একত্ৰিত কৰা হৈছিল আৰু তামুলপুৰ জিলাক বাক্সা জিলাৰ সৈতে একত্ৰিত কৰা হৈছিল। ফলত অসমৰ জিলাসমূহৰ সংখ্যা ৩৫ ৰ পৰা ৩১ লৈ হ্ৰাস পাব। বৈঠকখনে উত্তৰ গুৱাহাটী নগৰ সমিতিক কামৰূপ মেট্ৰ’পলিটান জিলাৰ অধীনলৈ অনাৰ বাবেও অনুমোদন জনাইছিল।
ৰাজ্য চৰকাৰৰ সিদ্ধান্তটো অসমৰ কেইবাটাও ৰাজনৈতিক দলে সাব্যস্ত কৰিছিল তীব্ৰ প্ৰতিবাদ। ভাৰতীয় জাতীয় কংগ্ৰেছ, অসম জাতীয় পৰিষদ, আম আদমী পাৰ্টি, তৃণমূল কংগ্ৰেছ, চিপিএম, চিপিআই-এমএল-এ অংশগ্ৰহণ কৰিছিল প্ৰতিবাদত।।