নিউজ ডেস্ক: সোমবাৰে পশ্চিম কলম্বিয়াত ৭.৪ প্ৰাবল্যৰ শক্তিশালী ভূমিকম্পই ব্যাপক আতংকৰ সৃষ্টি কৰে। ভূমিকম্পৰ জোকাৰণি চুবুৰীয়া ইকুৱেডৰতো অনুভূত হয়। বহু লোকে নিৰাপত্তাৰ বাবে ঘৰ আৰু বিভিন্ন অট্টালিকাৰ পৰা ওলাই আহে। কলম্বিয়াৰ কালি চহৰত ভূমিকম্পৰ ফলত কমেও ২০টা অট্টালিকা ভাঙি পৰিছে বুলি চহৰখনৰ মেয়ৰ আলেহান্দ্ৰো এডাৰে জানিবলৈ দিয়ে। কেইবাজনো লোক ধ্বংসস্তূপৰ ভিতৰত আবদ্ধ হৈ থকাৰ আশংকা কৰা হৈছে। উদ্ধাৰ অভিযানত সহায়ৰ বাবে বোগোটা আৰু মেডেলিনৰ পৰা বিশেষ উদ্ধাৰকাৰী দল বিচৰা হৈছে।
আমেৰিকাৰ জিঅ’লজিকেল ছাৰ্ভে (USGS) আৰু কলম্বিয়াৰ সংশ্লিষ্ট ভূমিকম্প নিৰীক্ষণ সংস্থাৰ তথ্য অনুসৰি, ভূমিকম্পটোৰ অভিকেন্দ্ৰ আছিল চোকো অঞ্চলৰ ছান হোচে দেল পালমাৰ পৌৰসভাৰ ওচৰত। এই স্থান কলম্বিয়াৰ ৰাজধানী বোগোটাৰ পৰা প্ৰায় ৪০০ কিলোমিটাৰ পশ্চিমে অৱস্থিত।
উল্লেখ্য যে জুন মাহৰ শেষভাগত ভেনিজুৱেলাত একেৰাহে ৭.২ আৰু ৭.৫ প্ৰাবল্যৰ দুটা শক্তিশালী ভূমিকম্প সংঘটিত হৈছিল। সেই ভূমিকম্পত শ শ অট্টালিকা ধ্বংস হোৱাৰ লগতে ৫,০০০ৰো অধিক লোকৰ মৃত্যু হৈছিল।
