গুৱাহাটীঃ ৰাজ্যত অব্যাহত আছে বানৰ বিভীষিকা। বৰ্তমানেও ৰাজ্যৰ ২৫ খন জিলাৰ বিস্তীৰ্ণ অঞ্চল বানৰ পানীত বুৰ গৈ আছে। জিলাকেইখনৰ বিভিন্ন প্ৰান্তত বানৰ তাণ্ডৱ অব্যাহত থকাৰ ফলত জনজীৱন বিপৰ্যস্ত হৈ পৰিছে। বৰ্তমানলৈ ৰাজ্যৰ ৮৭ টা ৰাজহ চক্ৰৰ ২,৬৩১ খন গাঁও বৰ্তমানেও বানৰ পানীৰ তলত আছে। বানৰ ফলত এতিয়ালৈকে মৃতকৰ সংখ্যা ১০০ গৰাকীলৈ বৃদ্ধি পাইছে। ইয়াৰ মাজতে নতুনকৈ ৫ জন লোক সন্ধানহীন হৈ থকাৰ তথ্য পোহৰলৈ অহাত মৃতকৰ সংখ্যা আৰু অধিক বৃদ্ধি পোৱাৰ আশংকা কৰা হৈছে।
বানৰ প্ৰবল সোঁতত ৰাজ্যত ব্যাপকভাৱে ক্ষতিগ্ৰস্ত হৈছে বাসগৃহ। এতিয়ালৈকে ৪,৪৮৯ টা বাসগৃহ সম্পূৰ্ণৰূপে ধ্বংস হোৱাৰ বিপৰীতে ১৪,৮৬৮ টা বাসগৃহ আংশিকভাৱে ক্ষতিগ্ৰস্ত হৈছে। বানত ক্ষতিগ্ৰস্ত হোৱা পৰিয়ালসমূহক ৰাজ্য চৰকাৰে উপযুক্ত ক্ষতিপূৰণ প্ৰদান কৰা উচিত বুলি দাবী উঠিছে। ইতিমধ্যে ক্ষয়-ক্ষতিৰ প্ৰকৃত পৰিমাণ নিৰূপণৰ বাবে জৰীপৰ কাম আৰম্ভ কৰিছে ৰাজ্য চৰকাৰে। বানৰ ভয়ংকৰ ৰূপত ৰাজ্যজুৰি এতিয়ালৈকে প্ৰায় ১২ লাখ লোক ক্ষতিগ্ৰস্ত হৈছে। ঘৰ-বাৰী, কৃষিভূমি আৰু অন্যান্য সম্পত্তিৰ ব্যাপক ক্ষতিৰ ফলত বহু পৰিয়ালৰ জীৱন-জীৱিকা অনিশ্চিত হৈ পৰিছে।
বান পৰিস্থিতি স্বাভাৱিক হ’বলৈ এতিয়াও সময় লাগিব পাৰে। বিশেষকৈ সন্ধানহীন লোকসকলৰ সন্ধান, ক্ষতিগ্ৰস্ত পৰিয়ালসমূহক ক্ষতিপূৰণ আৰু বানৰ পাছত পুনৰ সংস্থাপনৰ কাম এতিয়া চৰকাৰৰ বাবে অন্যতম বৃহৎ প্ৰত্যাহ্বান হৈ পৰিছে।
